Взбранной Воеводе, Владычице нашей Богородице благодарственная пения восписуем о явлении чудныя Ея иконы, к Нейже притекающии присно избавляются от враг видимых и невидимых. Ты же, Госпоже неба и земли, яко милосердная Мати, приими ныне малое сие моление наше и неотступну никогдаже сотвори милость Твою от нас и заступление, охраняющи от всех бед и напастей нас, зовущих Ти:
Радуйся, Владычице, милостивая о нас пред Богом Заступнице.

Ангелов лицы ликовствующе служат Тебе, Владычице, и почитающе Тя, на руку Твоею носившую Творца видимыя и невидимыя твари, икону Твою с места на место преносят. Мы же, земнороднии, дивящеся чудному явлению иконы Твоея, Ангелы носимыя, вопием Ти сице:
Радуйся, всех Небесных сил высшая;
Pадуйся, вся Ангельския чины превосходящая.
Радуйся, честнейшая Херувим;
Pадуйся, славнейшая без сравнения Серафим.
Радуйся, радование Ангелов;
Pадуйся, похваление ликов небесных.
Радуйся, от Ангелов воспеваемая;
Pадуйся, от Серафимов прославляемая.
Радуйся, от Архангел покланяемая;
Pадуйся, от воинств Небесных почитаемая.
Радуйся, в иконе Твоей от Ангел чтимая;
Pадуйся, в видимом образе Твоем от невидимых сил носимая.
Радуйся, Владычице, милостивая о нас пред Богом Заступнице.

Видяще рыбарие над пучиною вод носимую невидимою силою и светом подобно солнцу сияющую Твою, Богомати, икону с Предвечным Младенцем, рыбарей призвавшим на уловление мира в сети спасения, возопиша: Аллилуиа.

Разум недоразуменный дивнаго явления иконы Твоея разумети людие ищуще, уведеша, яко чтимая в Цареграде пречестная икона в наследие российскому роду даровася. Темже мы, благодаряще за милость Твою к роду нашему, вопием Ти:
Радуйся, Мати истинныя жизни;
Pадуйся, послушанием Твоим преслушание Евы исцелившая.
Радуйся, затворенный Едем отверзшая;
Pадуйся, миру явившая Сокрушителя главы змиевой.
Радуйся, ковчеже, умирителя мира носивший;
Pадуйся, мир спасшая от потопления греховнаго.
Радуйся, лествице, еюже сниде Бог;
Pадуйся, земных возводящая на небо.
Радуйся, море, фараона мысленнаго потопившее;
Pадуйся, купино, не опалившаяся всельшимся в Тя огнем Божества.
Радуйся, скрижале Богописанная;
Pадуйся, каменю, воду жизни источивший жаждущим.
Радуйся, Владычице, милостивая о нас пред Богом Заступнице.

Сила Вышняго осеняше страну Тихвинскую, егда икона Пречистыя Богоматере, многочастне являющися и временным пребыванием освящающи землю, к воздвизанию храмов святых возбуждаше, да славится имя Владычицы во славу Триипостаснаго Бога, Емуже вопием: Аллилуиа.

Имущи благоутробное изволение, да людие страны Тихвинския вожделеют пребывания Твоего с ними, да памятуют выну покров Твой, икону Твою являла еси многочастне, дондеже указала еси богоизбранное место вселения ея. Темже чудящеся вопием Ти:
Радуйся, скиние, в нейже вселися Божество телесне;
Pадуйся, Святая святых, в нюже единою вниде вечный Архиерей.
Радуйся, кивоте, позлащенный Духом, Законодателя носивший;
Pадуйся, светильниче, огнем Божественным возженный.
Радуйся, стамно, носившая манну жизни Христа;
Pадуйся, трапезо, хлеб животный вместившая.
Радуйся, кадильнице, угль Божества имущая, мир весь облагоухавшая;
Pадуйся, жезле, цвет прозябший Христа.
Радуйся, столпе, к вечному наследию руководяй;
Pадуйся, облаче, от враг видимых и невидимых покрываяй.
Радуйся, земле обетования;
Pадуйся, руно, на негоже Христос, яко дождь, сниде с небесе.
Радуйся, Владычице, милостивая о нас пред Богом Заступнице.

Бурю смущения и скорби утолити тщащеся, благовернии людие взываша ко Господу: яви нам божественный дар, егоже человеколюбне стране Российстей послал еси, не скрый сокровища, имже душевную нищету нашу обогатити надеяхомся, претвори печаль нашу в радость, отри слезы и рыдания. И улучивше желаемое, возопиша: Аллилуиа.

Слышав пастырь паствы своея радостное обретение и Матерь Пастыреначальника упасшуюся в странах Тихвинских, устрояет храм в честь новоявленныя иконы Ея и пресвитеры учреждает, да выну прославляюще Богоматерь, вопиют Ей:
Радуйся, Дщи, приклонившая ухо ко гласу Отца Небеснаго;
Pадуйся, яко праматернее сетование разрушися рождеством Твоим.
Радуйся, Невесто, Еяже доброты вожделе Царь Небесный;
Pадуйся, Царице, одесную Царя представшая.
Радуйся, рясны златыми украшенная и всю славу внутрь имущая;
Pадуйся, вводящая многих в чертог Царства Небеснаго.
Радуйся, яблоко, егоже благовоние обоняет весь мир;
Pадуйся, крине чистоты, блистанием светящийся.
Радуйся, миро благовонное, всему миру излиянное;
Pадуйся, царскую порфиру, плоть Творца всех, из девственных кровей Твоих исткавшая.
Радуйся, живый запечатленный источниче, источивший воду жизни;
Pадуйся, мысленный винограде, грозд Божественный возрастивший.
Радуйся, Владычице, милостивая о нас пред Богом Заступнице.

Боготечная звезда явися икона Твоя, Богомати, всю страну Тихвинскую обтекающи и сущих во тьме невежествия светом боговедения озаряющи, скорбящих радостию осиявающи, заблуждающих же на путь делания заповедей Сына Твоего и Бога наставляющи, Емуже благодарственне вопием: Аллилуиа.

Видев Георгий на кладе древа седящу Жену, жезл червленный в руках имущу и светом неизреченным сияющу, Ейже предстоя беседоваше дивный святитель, позна чрез благоухание благодати Тя, Богородицу, чувственный зрак приимшую, и святителя Николая, предстояща Тебе, и возопи со трепетом:
Радуйся, доме, егоже созда Себе для вселения Премудрость Божия;
Pадуйся, Дево, Еммануила родившая.
Радуйся, жезле Ааронов, от негоже прозябе цвет Христос Бог;
Pадуйся, Неневестная Невесто, осенением Духа заченшая Сына.
Радуйся, свитче, в немже перстом Отчим написася Слово;
Pадуйся, книго девства запечатленная, Иосифу на хранение врученная.
Радуйся, клеще таинственная, угль Божества во чреве приемшая;
Pадуйся, Престоле превознесенный, на немже плотию возседе Христос.
Радуйся, облаче легкий, на немже прииде Господь славы;
Pадуйся, врата затворенная, имиже един Христос пройде.
Радуйся, горо несекомая, от неяже краеугольный камень отсечеся, Христос;
Pадуйся, огнеросная пеще, неопально приимшая огнь Божества.
Радуйся, Владычице, милостивая о нас пред Богом Заступнице.

Проповедник быв видимаго Твоего пребывания в стране Тихвинстей и дивнаго промышления о ней, благочестивый Георгий явление Твое и волю Твою людем возвести, ейже неповинующиися чудесы вразумляются славити Тя, Владычице, и пети Богу: Аллилуиа.

Возсияти свету Богопознания явлением иконы Твоея изволившая, и свет иноческия жизни возжещи благоволила еси, Богомати, на месте явления Твоея иконы, да иноков лицы вопиют Ти непрестанно:
Радуйся, неплоднаго корене благоплодное прозябение;
Pадуйся, от младенчества Богу посвященная.
Радуйся, во Святем храме воспитавшаяся;
Pадуйся, Богу уневестившаяся.
Радуйся, всеми добродетельми преукрашенная;
Pадуйся, светоносная палато, Владыце уготованная.
Радуйся, благодатию Божиею предочищенная;
Pадуйся, от начала веков во главизну нашего спасения предызбранная.
Радуйся, Невесто Архитектона небеснаго, земному тектону на хранение врученная;
Pадуйся, малый Назарет Своим пребыванием возвеличившая.
Радуйся, Горних сил похвало;
Pадуйся, всех земнородных славо.
Радуйся, Владычице, милостивая о нас пред Богом Заступнице.

Хотящим преподобным Мартирию и Кириллу во уединении подвизатися и труды и подвиги иноческими Богу угождати, путь в место вожделеваемаго подвига в столпе огненнем и гласе указала еси. Они же, познавше Тя, яко Одигитрию благую, спутешествующую им, возопиша Богу: Аллилуиа.

Новый источник чудес в стране северней явися икона Твоя Тихвинская, Пресвятая Владычице, независтно точащий исцеления всем притекающим с верою: слепии бо прозирают, немии благоглаголиви бывают, глусии слышат, разслаблении возстают, бесноватии от уз демонских свобождаются. Темже, славяще Тя, вопием:
Радуйся, яко на Тебе почи благоволение Отчее;
Pадуйся, Духом Святым осененная.
Радуйся, яко из Тебе воплотися Сын Божий, Спас миру;
Pадуйся, Совета Неизреченнаго Таиннице.
Радуйся, от Ангела благовестие приимшая;
Pадуйся, ангельским, еже радуйся, весь мир обрадовавшая.
Радуйся, яко Господь с Тобою;
Pадуйся, яко Тобою вси земнороднии Богу приближишася.
Радуйся, Благословенная в женах;
Pадуйся, всем женам благословение даровавшая.
Радуйся, Мати, до рождества и по рождестве пребывшая Девою;
Pадуйся, начаток чести и славы девства.
Радуйся, Владычице, милостивая о нас пред Богом Заступнице.

Странно чудо явления образа Твоего, Владычице, и несказанно, удивляет премирная и ужасает земная, вкупе же и просвещает благодатию рождшагося от Тебе Христа Бога нашего. Странно и заступление обители от врагов, хвалившихся разорити достояние Твое. Сего ради вопием Богу: Аллилуиа.

Вся еси в вышних, Владычице, но и нижних не оставляеши, защищающи, аки стеною и забралом, честною иконою Твоею обитель Твою. Рекла бо еси, егда бысть нашествие вражие: «Да возмут людие икону Мою и обыдут по стенам окрест, и узрят милость Божию». Темже избавлении Тобою от враг возопиша Тебе:
Радуйся, Мати Творца и Господа Своего;
Pадуйся, Еяже ради младенец Иоанн взыграся во чреве Елисаветы.
Радуйся, от всех родов ублажаемая;
Pадуйся, смирением возвышенная.
Радуйся, небесным радование и земным мир Рождением Твоим даровавшая;
Pадуйся, от Ангелов славословие, от пастырей величание, от волхвов поклонение о Рождении Твоем приимшая.
Радуйся, млеком питавшая горняя и дольняя благодатию Своею Питающаго;
Pадуйся, пеленами повившая одевающагося светом, яко ризою.
Радуйся, носившая на руку Твоею Носящаго весь мир дланию;
Pадуйся, во храм принесшая священие храма.
Радуйся, Симеоном благословенная;
Pадуйся, Анною пророчицею возвеличенная.
Радуйся, Владычице, милостивая о нас пред Богом Заступнице.

Всякаго естества ангельскаго чистейши сущи, Владычице, обитель, ради пришествия Твоея иконы созданную, от нечистоты греховныя близ погибели бывшую, но покаянием очистившуюся, яко общая Молебница о роде христианстем, избавила еси от врагов, по подобию нечистых животных подкопати ю трудившихся. Темже вопием Богу: Аллилуиа.

Ветия многовещаннии недоумеют воспети по достоянию множество чудес Твоих, Владычице, и тайны Твоего строения спасения человеков: ово бо благостию, ово же посещением наказаний руководиши людей на путь спасения. Зане необориму обитель сохранивши от врагов видимых, огненным очищением благоволила еси очистити от уязвлений врага невидимаго, вразумляющи, яко чистота, воздержание и молитвы сердечныя угоднее Тебе паче хвалы единых точию уст. Темже вопием Ти:
Радуйся, Египет освятившая пришествием Твоим;
Pадуйся, Галилейскую страну прославившая пребыванием Твоим.
Радуйся, по всему Иерусалиму искавшая Отроча Твое, Егоже возлюби душа Твоя;
Pадуйся, в дому Отца Его обретшая Его.
Радуйся, вся глаголы о Сыне Твоем слагавшая в сердце Своем;
Pадуйся, в Сыне Твоем прежде всех познавшая Бога.
Радуйся, Сыну Твоему послужившая в земном житии Его;
Pадуйся, страданием Его спострадавшая.
Радуйся, при Кресте Сына Твоего усыновление Иоанна апостола и всех верующих приимшая;
Pадуйся, матерински возлюбившая искупленных Кровию Его.
Радуйся, первее всех уразумевшая тайну Воскресения Сына Твоего;
Pадуйся, премногия радости насладившаяся в вознесении Сына Твоего на небеса.
Радуйся, Владычице, милостивая о нас пред Богом Заступнице.

Спасти хотящи многия люди от обдержащих их скорбей и болезней и веру их утвердити во всесильное заступление Твое, Владычице, во многих градех, обителех, весех православныя страны силу чудотворения даровала еси изображением честныя иконы Твоея, да видяще являемую Тобою милость, вопиют со умилением Богу: Аллилуиа.

Стена и щит была еси, Владычице, православному воинству, под знамением Твоея иконы противу двадесяти язык воинствовавшему, сохраняющи его от стрел вражиих. Темже буди стена и покров от всех врагов видимых и невидимых и нам, ко пречестней иконе Твоей с верою и любовию припадающим и вопиющим Тебе:
Радуйся, утешение верным по вознесении Сына Твоего;
Pадуйся, Учительнице и Споспешнице апостолом.
Радуйся, извещением Твоего к Богу отшествия обрадованная;
Pадуйся, лик ученический облаком к погребению Ти совокупльшая.
Радуйся, от земли дланьми Сына Твоего восприемлемая;
Pадуйся, от всех ангельских чиноначалий провождаемая.
Радуйся, земное небо, к горнему селению возвышенное;
Pадуйся, Престоле Господень, от земли вознесенный в Царствие Небесное.
Радуйся, воздух освятившая восхождением Твоим;
Pадуйся, чрез Фому уверившая Твое на небо с плотию преселение.
Радуйся, ученическому лику обещание хранити его исполнившая;
Pадуйся, присещением Твоим от Сына Твоего и Бога мир тому подавшая.
Радуйся, Владычице, милостивая о нас пред Богом Заступнице.

Пение всякое побеждается, спростретися тщащееся ко множеству чудес, присно бываемых от святыя Твоея и чудотворныя иконы. Якоже бо скорая Помощница, недуги исцеляеши, от бед избавляеши, от мучения демонов свобождаеши на всяком месте с верою Тя призывающих и вопиющих Богу: Аллилуиа.

Светоприемную свещу зрим святую икону Твою, Богомати, во странах Тихвинских благодатию Твоею возженную, всю страну просвещающую и многих ко свету привлекающую на спасение душ. Темже вопием Ти:
Радуйся, сохранити и спасати всех призывающих Тя обещавшая;
Pадуйся, прославляющих Тя прославляющая.
Радуйся, к Сыну Твоему и Богу молитвы верных приносящая;
Pадуйся, и Сама непрестанно у Престола Сына Твоего и Бога молящаяся о всех.
Радуйся, благодать Твою иконам Твоим честным даровавшая;
Pадуйся, всю вселенную лучами Твоея благодати озарившая.
Радуйся, честнейшая Херувим и славнейшая Серафим;
Pадуйся, всея твари высшая.
Радуйся, Царице неба и земли;
Pадуйся, яко много может молитва Твоя пред Сыном Твоим.
Радуйся, всего рода христианскаго скорое заступление;
Pадуйся, всех верных твердое упование.
Радуйся, Владычице, милостивая о нас пред Богом Заступнице.

Благодати Твоея новое знамение дати восхотевши, Петрову граду источник чудес отверзла еси, Богомати, в иконе Твоей, да верующий вразумляются, труждающиися и скорбящии обретают готовое прибежище и заступление, и прославляюще Бога, даровавшаго таковая, вопиют Ему: Аллилуиа.

Поюще чудеса Твоя и милости, роду нашему явленныя, умильно припадаем к пречистому образу Твоему, Владычице, и лобызающе, со страхом и любовию молим Тя: настави нас на путь спасения, да достойни будем выну Твоего Милостиваго заступления, буди присно Заступница и Ходатаица о нас, вопиющих Ти:
Радуйся, верных утверждение и защищение;
Pадуйся, неверных вразумление и просвещение.
Радуйся, отчаянных надеждо;
Pадуйся, грешных спасение.
Радуйся, печальных утешение;
Pадуйся, больных исцеление.
Радуйся, вдов и сирот покрове;
Pадуйся, обидимых прибежище.
Радуйся, царей укрепление;
Pадуйся, святителей удобрение.
Радуйся, девствующих похвало;
Pадуйся, всех благочестивых веселие.
Радуйся, Владычице, милостивая о нас пред Богом Заступнице.

О Всепетая Мати, рождшая всех святых Святейшее Слово, буди нам покров и защищение в жизни сей от врагов видимых и невидимых, от бед и скорбей, сохрани от искушений и грехопадений, и в будущей жизни, на Суде Сына Твоего и Бога нашего, буди Заступница и Ходатаица, избавляющи нас от вечнаго осуждения, да спасеннии Тобою, с лики ангельскими вопием Богу: Аллилуиа.
Этот кондак читается трижды, затем 1-й икос «Ангелов лицы...» и 1-й кондак «Взбранной Воеводе...».

О Пресвятая Дево, Мати Господа Вышних сил, небесе и земли Царице, града и страны нашея Всемощная Заступнице! Приими хвалебно-благодарственное пение сие от нас, недостойных раб Твоих, и вознеси молитвы наша ко Престолу Бога Сына Твоего, да милостив будет неправдам нашим и пробавит благость Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несумненней и скорей Заступнице нашей: услыши нас, молящихся Тебе, осени нас вседержавным покровом Твоим и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание: всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя: разсеянныя собери, заблуждшия на путь правый настави, старость поддержи, юныя уцеломудри, младенцы воспитай и призри на всех нас призрением Милостиваго Твоего заступления, воздвигни нас из глубины греховныя и просвети сердечная очи наша к зрению спасения, милостива нам буди зде и тамо, в стране земнаго пришельствия и на Страшнем суде Сына Твоего: преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. К Тебе убо молимся и Тебе, яко Всемогущей Помощнице, сами себе и друг друга и весь живот наш предаем, ныне и присно, и во веки веков. Аминь.

Тропарь, глас 4:
Днесь яко солнце пресветлое возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево Неискусобрачная.

Кондак, глас 8:
Притецем, людие, к Деве Богородице Царице, благодаряще Христа Бога, и к Тоя чудотворней иконе умильно взирающе припадем, и возопием Ей: о Владычице Марие! Присетивши страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.

Припев Богородице:
Достойно есть величати Тя, Богородице, честнейшую Херувим и славнейшую без сравнения Серафим.

Или:
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Празднование 26 июня/9 июля