Избранным рабам Господа Вседержителя, Вере, Надежде и Любови, и мудрей матери Софии, похвальная вам пения умиленно возносим. Вы же, яко дерзновение ко Христу Богу имуще, молитеся за ны, во еже избавитися нам грехов и скорбей, да благодарственно вопием вам:
Радуйтеся, Веро, Надеждо и Любы, купно с Софиею, материю вашею премудрою.

Ангели на Небеси радовахуся, добродетельное житие ваше зряще, еже провождасте в чтении Писаний Божественных, в трудех, посте, молитве и милостыни, материю вашею непрестанно суща поучаемы, да явитеся образи живии триех богословских добродетелей, ихже имены наречены бысте. Мы же, таковей мудрости матере вашея и совершенному благоразумию вашему дивящеся, благоговейно рцем вам:
Радуйтеся, единомысленныя сестры, трием добродетелем тезоименитыя;
Pадуйтеся, в повиновении богомудрей матери вашей на степени совершенствования вшедшия.
Радуйтеся, аки три райския ветви, в зловернем Риме возрасшия;
Pадуйся, Софие, дщерем твоим имена добродетелей нарекшая, яже вещию исполняти научила еси.
Радуйся, Веро, верою невидимое яко видимое зрети нам помогающая;
Pадуйся, в нетление облеченная.
Радуйся, Надеждо, надеждою страдания наша во юдоли скорби ослаблающая и в горняя десницею указующая;
Pадуйся, Царствие Небесное унаследовавшая.
Радуйся, Любы, любовию Божественною блаженство безсмертныя жизни нам открывающая;
Pадуйся, благодатию Духа Святаго осиянная.
Радуйся, Софие, сиесть премудрость, премудре дщери твоя воспитавшая;
Pадуйся, в добродетелех веры, надежды и любве нас утверждающая.
Радуйтеся, Веро, Надеждо и Любы, купно с Софиею, материю вашею премудрою.

Видящи мудрая София слуги, пришедша звати ю со дщерьми ко царю Адриану, и познавши вину призвания своего, ста со чады своими на молитву, помощи Бога просящи: по молитве же, емшеся за руце, якоже венец уплетенный, идяху вкупе, поюще Христу Богу: Аллилуия.

Разум несумненный имели есте, святыя, егда бо в палаты царския введены бысте, цареви Адриану предстаете с лицем светлым, очесы веселыми и сердцем мужественным. Царь же, зря честная лица ваша неустрашенна и мудрость Софии уведев, отложи на ино время суд свой и отсла вы к некоей благородней жене, у неяже пребысте три дни, матери вашей премудрей Богодухновенными словесы день и нощь вас поучающей. Темже ублажающе вас, взываем сице:
Радуйтеся, три непорочныя агницы Христовы, венец добродетелей в себе совокупившия;
Pадуйтеся, три добродетельныя сестры, твердую веру, несумненную надежду и нелицемерную любовь ко Господу Богу явившия.
Радуйтеся, не пощадевшия красоты и младости вашея, Краснейшаго ради добротою паче сынов человеческих;
Pадуйся, Софие, чада твоя возлюбленная на подвиг мученическ за Христа наставлявшая.
Радуйся, Веро, мучением за Христа веру твою исповедавшая;
Pадуйся, сестры твоя крепкою верою воздвизавшая.
Радуйся, Надеждо, твердое надеяние на Христа возлагавшая;
Pадуйся, сестры твоя неослабною надеждою укреплявшая.
Радуйся, Любы, муками за Христа любовь твою действенную показавшая;
Pадуйся, сестры твоя огнем любве ограждавшая.
Радуйся, Софие, сладкая чада твоя увещававшая презрети славу и богатство и всю сладость мира сего тленнаго;
Pадуйся, добрыя дщери твоя до крове стати за Господа и умрети за Него усердно учившая.
Радуйтеся, Веро, Надеждо и Любы, купно с Софиею, материю вашею премудрою.

Силою Божественною осенены бяху мученицы, яже добродетели имен своих явиша делом в подвизех мученических, воспевающе Богу: Аллилуия.

Имуще в себе святыя мученицы столп веры, криле надежды и огнь любве, в сладость послушающия от словес матере своея, едина другую в долготерпении утверждаху и радостно идяху, желающе честнаго мученичества, еже за Христа. Тому покланяющеся, яко Богу нашему, сицевыми вас воззваньми почитаем:
Радуйтеся, ни мало не поскорбевшия о лишении временнаго сего живота вечныя ради жизни;
Pадуйтеся, чести ради Христовы плоть на муки предавшия.
Радуйтеся, три многоценныя сосуды веры, надежды и любве Богу в дар принесшия;
Pадуйся, Софие, яко, любве ради презельныя ко дщерем твоим, всем сердцем возжелела еси, да Царствие Божие наследуют.
Радуйся, Веро, души наша верою озаряющая;
Pадуйся, к тихому пристанищу нас возносящая.
Радуйся, Надеждо, сердца наша сладостию надежды оживляющая;
Pадуйся, из пучины отчаяния нас извлекающая.
Радуйся, Любы, страдания и скорби наша в радость прелагающая;
Pадуйся, окамененная сердца наша во умиление преводящая.
Радуйся, Софие, мудростию на благое нас наставляющая;
Pадуйся, потемненное око душ наших просвещающая.
Радуйтеся, Веро, Надеждо и Любы, купно с Софиею, материю вашею премудрою.

Буря ярости мучителевы нападе на тя, святая Веро, но не поколеба тя; кто бо возможет веру неодолимую подвигнути, адаманта крепчайшую, яже верных научила есть пети с тобою Богу: Аллилуия.

Слышащи мудрая мати дщери своя пред царем небоязненно Христа исповедающия и глаголющия, яко того единаго желают, еже страдати и терпети горькия муки сладкаго ради Иисуса Христа, радовашеся вельми и моляше Бога, да укрепит я в предлежащих муках. Сие убо изволение похваляюще, первейшей дщери мудрыя матере тако воспоем:
Радуйся, Веро, немилосердая биения сладчайшаго ради Иисуса сладце приемшая;
Pадуйся, урезанная сосца твоя, аки два крина чистоты, в жертву Господу принесшая.
Радуйся, яко от язвы твоея вместо крове млеко истече;
Pадуйся, яко на раскаленное железо положена была еси.
Радуйся, яко в коноб кипящ ввержена сущи, ни мало не опалилася еси, ниже вредилася еси;
Pадуйся, страстей наших небесною прохладою утишающая.
Радуйся, огнь мучений наших в болезнех угашающая;
Pадуйся, знамением веры посреде напастей нас знаменающая.
Радуйся, щитом веры во брани со врагом нас покрывающая;
Pадуйся, честную главу твою за главу Церкве, Христа Бога, под меч радостно преклоншая.
Радуйся, яко обагрением крове твоея, аки червленицею, одеяна, явилася еси очесем безсмертнаго Жениха твоего;
Pадуйся, к желанному краю пришедшая и любимаго Спаса и Господа узревшая.
Радуйтеся, Веро, Надеждо и Любы, купно с Софиею, материю вашею премудрою.

Богоданным звездам уподобилися есте, Веро, Надеждо и Любы, всем бо сердцем прилепившася ко единому вечному животу и красоте неизреченней, Иисусу Христу, скоро шествовасте, во еже умрети за Него и насладитися Божественнаго Его видения, поюще Ему: Аллилуия.

Видевше добропобедныя сестры святую Веру радостно за Христа пострадавшу, и сами хотяху души своя за Него положити: царь же Надежду святую начат испытовати, и видев ю с сестрою единомысленну сущу, на муки вдаде ю, обаче ничтоже успе. Мы же, Надежду святую о сицевом ея мудровании ублажающе, воспоим и прославим ю:
Радуйся, Надеждо, жестоко биенная, обаче пресветлую надежду на Господа не потерявшая;
Pадуйся, муки твоя безропотно в молчании терпевшая.
Радуйся, и нам крепкое терпение подающая;
Pадуйся, яко в разжженней пещи неопаляема бывши, хвалу Богу возсылала еси.
Радуйся, яко и нас во страданиих хвалити Бога научаеши;
Pадуйся, яко когтьми железными строгана была еси.
Радуйся, нас, сущих в скорбех, лучами надежды осиявающая;
Pадуйся, яко чудное некое благоухание от язв твоих исхождаше.
Радуйся, непоколебимое упование на Господа Иисуса неизменно сохраншая;
Pадуйся, безнадежность и безсилие в сердцах наших истребляющая.
Радуйся, мечное посечение за Христа радостно приимшая;
Pадуйся, ясная деннице, нам, печальми земными угнетенным, мир вечный раскрывающая.
Радуйтеся, Веро, Надеждо и Любы, купно с Софиею, материю вашею премудрою.

Проповедником и апостолом богоносным подобны бысте, богомудрыя сестры: добродетельми бо вашими проповедаете всем верным веру, надежду и любовь ко Господу, Владыце всех, Тому поюще: Аллилуия.

Возсияла еси, аки солнце, Любы святая, кто бо сице за возлюбленнаго Господа своего можаше стати, якоже Любы, понеже писано есть: крепка яко смерть любы, вода многа не может угасити любве, и реки не потопят ея. Молим ти ся ныне, Любы святая, Серафимским пламенем любве ко Господу горящая, обнови окамененная и изсохшая сердца наша, возжги в нас, оскудевших любовию, свет любве, да возлюбльше Господа и вся ближния наша, тебе, яко молитвенницу нашу, восхвалим сице:
Радуйся, Любы, яко любве твоея ко Христу воды многи прелестей мирских не угасиша;
Pадуйся, яко вся ласкания и дары царевы отвергши, душу твою за Господа положила еси.
Радуйся, яко любве твоея реки бед и страданий не потопиша;
Pадуйся, за Господа Иисуса на колеси протягнутая, жезлием биенная, свердлами прободенная и в пещь огненную вверженная.
Радуйся, яко в лютых муках твоих силою Божиею укрепляема была еси;
Pадуйся, кровию твоею, любве ради к Безсмертному Жениху твоему Христу излиянною, в хладных сердцах наших любовь возбуждающая.
Радуйся, яве показавшая нам, яко любве ради вся мучения сладце претерпеваются;
Pадуйся, явившая нам, яко любы Божественная приводит к животу вечному.
Радуйся, самою вещию уверившая, яко любы Божественная откровение есть безсмертия;
Pадуйся, яко никаяже мучительства возмогоша разлучити Любовь от любве Христовы.
Радуйся, в муках апостольски вещавшая, яко не разлучит тя от любве Божия ни скорбь, ни теснота, ни гонение, ни глад, ни нагота, ни беда, ни меч;
Pадуйся, любве ради Христовы мечем во главу усеченная.
Радуйтеся, Веро, Надеждо и Любы, купно с Софиею, материю вашею премудрою.

Хотяще скорее от тела разлучитися и со Христом быти святыя девы, егда на мечное посечение идяху, едина другую и матерь свою Софию объемлюще лобызахуся, дружескому нас люблению поучающе, да вси купно поем Богу: Аллилуия.

Новое чудо показа Господь, егда помощь Свою посла страдавшим за исповедание имене Его толико юным девам: верою бо, надеждою и любовию укрепляемы и возносимы бывше, доблественне подвиги своя скончаша. Мы же в единомыслии и единодушии до конца живота пребывших молим вас, да и нам низпослете единомыслие в совершении добрых дел, умиленно величающим вас:
Радуйтеся, Веро, Надеждо и Любы, единем путем мучений до врат небесных шедшия;
Pадуйтеся, в пресветлый чертог прелюбезнаго Жениха вашего во гласе радования вшедшия.
Радуйтеся, яко Иисус Христос просвети, якоже звезды на небеси, раны на телесех ваших;
Pадуйся, Софие, доблественне на муки чад твоих взиравшая.
Радуйтеся, яко небесною красотою, еяже око не виде, украси Господь доброту вашу, муками отъятую;
Pадуйтеся, венцы воздаяния приемшия.
Радуйтеся, аки три звезды, Солнцем правды озаренныя;
Pадуйся, Софие, в мужественнем исповедании дщерьми твоими имене Христова утешение велие обретшая.
Радуйтеся, мглу сомнений наших разсеявающия;
Pадуйтеся, нас, удрученных страданьми душевными и телесными, подкрепляющия.
Радуйтеся, красотою любве сердца наша украшающия;
Pадуйся, Софие, крепосте и утешение изнемогающих в бедах и нуждах.
Радуйтеся, Веро, Надеждо и Любы, купно с Софиею, материю вашею премудрою.

Странное и непонятное нам немощным, в мирских сластех погрязнувшым, зрим дело, яко София святая, возлюбленных чад своих видящи лютыя и горькия муки и смерти, ни мало не поскорбе, но возрадовася зело духом, поющи Богу: Аллилуия.

Вся бе в вышних мудрая София, егда дщери своя сладкими словесы и мудрыми увещаньми на мучения подвизаше. Аще же от естества к слезам преклоняшеся абие, от любве Христовы прелагашеся на радость, печаль бо сердечную и болезнь о чадех матернюю победи в ней любы Божия. Велиею убо любовию дщери своя любящи, паче всего тем Царствия Небеснаго желаше. Сего ради, чудящеся мудрости и велицей любви твоей ко дщерем и славяще тя, взываем:
Радуйся, Софие, яко возвеселися душа твоя о блаженней кончине дщерей твоих, святое имя Господа дерзновенно исповедавших;
Pадуйся, в мученичестем венчании чад твоих честь и славу приявшая.
Радуйся, участия мученическаго и спребывания со дщерьми в небесней славе Христа Бога сподобльшаяся;
Pадуйся, честная телеса дщерей твоих с радостными слезами погребшая.
Радуйся, три дни гробу их приседевшая и сном смерти о Господе почившая;
Pадуйся, аще и не плотию, обаче сердцем за Христа страдавшая.
Радуйся, яко три добродетельныя дщери, сими веру, надежду, любовь к Богу явивши, в дар Пресвятей Троице принесла еси;
Pадуйся, яко чадородия ради спаслася еси.
Радуйся, дивная мати, благия памяти достойная;
Pадуйся, дщери твоя, да кровь свою за Христа пролиют, молившая.
Радуйся, умудряющая ны, да блюдем непреложно добродетели веры, надежды и любве;
Pадуйся, Животворящей Троице за ны молящаяся.
Радуйтеся, Веро, Надеждо и Любы, купно с Софиею, материю вашею премудрою.

Вся Ангели дивляхуся о страданиих ваших, святыя мученицы, и победу вашу над диаволом торжествующе, души же ваша к Небеси провождающе, воспеваху Христу Богу: Аллилуия.

Ветии велеречивии вся страдания ваша за Христа не возмогут изрещи, дивящеся же толиким подвигом, во младых летех подъятым, немотствуют. Мы же о честней кончине вашей Бога прославляюще, величаем вас сице:
Радуйтеся, Веро, Надеждо и Любы, поющия хвалу Богу, на Небо Небесе возшедшему;
Pадуйтеся, щите веры, броне надежды и светильниче любве.
Радуйтеся, зрением пресветлаго лица Божия наслаждающияся;
Pадуйся, Софие, благочестивыя матери на мудрое воспитание чад их наставляющая.
Радуйтеся, поучающия ны, да взыщем Господа, и жива будет душа наша;
Pадуйтеся, с верою, надеждою и любовию прибегающих к вам теплыя молитвенницы.
Радуйтеся, вразумляющия ны, яко вся сладость и прелесть мира сего яко дым изчезает, яко прах от ветра разметается и в персть обращается;
Pадуйся, Софие, всем сердцем Господа Бога возлюбльшая.
Радуйтеся, аки трие светлии ключи, ко единому Источнику жизни притекшия;
Pадуйтеся, аки трие благовоннии цвети, на единей благоплодней ветви прозябшия.
Радуйтеся, аки три зерцала, безпредельную красоту Божию в себе отражающия;
Pадуйся, Софие, аки маслина, три ветви, отягченныя изобильными плоды даров Божиих, произрастшая.
Радуйтеся, Веро, Надеждо и Любы, купно с Софиею, материю вашею премудрою.

Спасти хотяще души своя святыя мученицы, любве ради Христовы ласкания царева и богатства мира сего тленнаго презреша и радостно кончину мученическую за Христа прияша, поюще Ему: Аллилуия.

Стенами веры, надежды и любве являются святыя мученицы всем, прибегающим к ним с теплою и усердною молитвою, и сице в печалех и напастех к ним взывающим:
Радуйтеся, язв греховных добрыя целительницы;
Pадуйтеся, во тьме печали нашея светом упования ны озаряющия.
Радуйтеся, посреде напастей и скорбей дивный покой нам посылающия;
Pадуйся, Софие, о нас, в злостраданиих поверженных, мудрое попечение являющая.
Радуйся, Веро, крест спасения пред нами воздвизающая;
Pадуйся, немощи наша по молитвам к тебе исцеляющая.
Радуйся, Надеждо, якорь избавления нам подающая;
Pадуйся, уныние сердец наших благостно отъемлющая.
Радуйся, Любы, твоим ко Господу ходатайством в злей напасти от нечаянныя смерти ны ограждающая;
Pадуйся, изнемогающия силы наша на бодрость возставляющая.
Радуйся, Софие, прилежная о нас к Богу молитвеннице;
Pадуйся, в добрых делех наших мудрая наставнице.
Радуйтеся, Веро, Надеждо и Любы, купно с Софиею, материю вашею премудрою.

Пение сие похвальное аще бы и тьмочисленное приношахом вам, святыя мученицы, не бы довлело ко прославлению добродетелей и подвигов ваших: обаче хвалу Богу возсылающе за вся, яже во святых Своих нам являет, Тому поем: Аллилуия.

Светом небесным пред Господем горящим свещам подобны Вера, Надежда и Любы, купно с материю их Софиею, к нимже припадаем, моляще, да просветят ны, омраченныя печальми и из глубины сердец зовущия:
Радуйтеся, ризы ваша в крови Агнчи на земли убелившия;
Pадуйтеся, живота вечнаго нам ходатаицы.
Радуйтеся, душ, ищущих покоя в милосердии Божии, утверждение и хранение;
Pадуйся, Софие, от суеты мирския ны ограждающая.
Радуйся, Веро, доброценная кадильнице, фимиам хвалы Богу возносящая;
Pадуйся, нас грешных верою просвещающая.
Радуйся, Надеждо, в скорби утешение и прибежище наше;
Pадуйся, в печалех наших лучезарная вестнице избавления.
Радуйся, Любы, незлобие и кротость в сердца наша вливающая;
Pадуйся, таинственная звездо, от тесноты земныя горе ны возносящая.
Радуйся, Софие, мудрая и пречестная детоводительнице;
Pадуйся, богомудраго жития молящимся ти устроительнице.
Радуйтеся, Веро, Надеждо, и Любы, купно с Софиею, материю вашею премудрою.

Благодать Божию прияти сподобившияся, молите о нас, святыя мученицы, пречистаго Владыку Христа, да милостив будет к нам грешным, с верою, надеждою и любовию Ему Единому, Господу и Спасу нашему, смиренно поющим: Аллилуия.

Поем ваша крепкия подвиги, верою, надеждею и любовию проникновенныя, почитаем страдания ваша презельная, хвалим дивное терпение ваше, ублажаем кончину, за Христа вами радостно подъятую, величаем необоримое мужество ваше, святыя мученицы Веро, Надеждо и Любы, и мудрая мати Софие, и прославляюще вас, взываем сице:
Радуйтеся, аки три струи молниины, от восток даже до запад добродетельми своими просиявшия;
Pадуйтеся, фиали веры, надежды и любве, животворным питием души наша напаяющии.
Радуйтеся, трие светозарнии путие, ко Престолу славы Господни нас ведущии;
Pадуйся, Софие, чад ради твоих от лика святых похваленная.
Радуйся, Веро, цвете веры, паче снега белейший;
Pадуйся, услаждение страждущих.
Радуйся, Надеждо, угнетенных сердец возношение;
Pадуйся, аки поток цельбоносный, жажду скорбящих душ утоляющая.
Радуйся, Любы, венче из мира, радования и благости соплетенный;
Pадуйся, умная зарнице вечности.
Радуйся, Софие, жезле силы, кротце и мудре чада наказуяй;
Pадуйся, боговедения пресветлая луче, душам нашим возсиявающая.
Радуйтеся, Веро, Надеждо и Любы, купно с Софиею, материю вашею премудрою.

О святыя и достохвальныя мученицы, Веро, Надеждо и Любы, и мудрая мати Софие, ныне приемше малое сие моление наше, от всяких ны бед, болезней и скорбей молитвами вашими избавите, да сподобльшеся во Царствии Небеснем зрети безсмертнаго Господа Иисуса, с вами вкупе воспоем Ему: Аллилуия.
Этот кондак читается трижды, затем 1-й икос «Ангели на Небеси...» и 1-й кондак «Избранным рабам...».

О святыя и достохвальныя мученицы Веро, Надеждо и Любы, и доблестных дщерей мудрая мати Софие, к вам ныне притецем со усердною молитвою; что бо паче возможет предстательствовати за ны пред Господем, аще не вера, надежда и любы, три сия краеугольныя добродетели, в нихже образ нареченныя, самою вещию тыя явисте! Умолите Господа, да в скорбех и напастех неизреченною благодатию Своею покрыет ны, спасет и сохранит, яко Благ есть и Человеколюбец. Того славу, яко солнце незаходимое, ныне зряще светолепну, споспешествуйте нам во смиренных молениих наших, да простит Господь Бог грехи и беззакония наша, и да помилует нас грешных и недостойных щедрот его. Молите убо о нас, святыя мученицы, Господа нашего Иисуса Христа, Емуже славу возсылаем со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Тропарь, глас 4:
Торжествует Церковь первородных, и свеселится приемля матерь о чадех веселящуюся, яже яко мудрости тезоименитая, тройственным богословским добродетелем равночисленныя породи. Тыя с мудрыми девами зрит уневестившияся Жениху Богу Слову. С нею и мы духовне в памяти их свеселимся, глаголюще: Троицы поборницы, Веро, Любве и Надеждо, в вере, любви и надежде утверждайте нас.

Ин тропарь, глас 1:
Агницы словесныя Агнцу и Пастырю приведостеся мучением ко Христу, течение скончавше и веру соблюдше; темже днесь радостною душею совершаем, досточуднии, святую вашу память, Христа величающе.

Кондак, глас 1:
Софии честныя священнейшия ветви, Вера и Надежда и Любовь, показавшеся, мудрость обуиша еллинскую благодатию, и пострадавше, и победоносицы явившеся, венцем нетленным от всех Владыки Христа увязошася.

Величание
Величаем вас, страстотерпицы святыя, и чтим честная страдания ваша, яже за Христа претерпели есте.

Память 17/30 сентября