Избранней Предвечным Царем, превышшей всякаго создания Небесе и земли Царице, пришедшей иногда во Влахернскую церковь на молитву, достойное поклонение с благодарением приносящи, яко во тьме сущии, под Твой светящийся омофор с верою и умилением прибегаем. Ты же, яко имущи державу непобедимую, от всяких нас бед свобождай, да зовем Ти:
Радуйся, Радосте наша, покрый нас от всякаго зла честным Твоим омофором.

Архангел и Ангел множеством со Предтечею, Богословом и всех святых ликом сопредсташа Тебе, Царице своей, в церкве Влахернстей и, умиленная моления Твоя о всем мире Слышавше, со удивлением возопиша таковая:
Радуйся, Бога Отца безначальнаго превечное благоволение;
Pадуйся, Бога Сына безлетнаго пречистое вместилище.
Радуйся, Бога Духа Всесвятаго избранное жилище;
Pадуйся, горних чинов ангельских непрестающее удивление.
Радуйся, темных сил адских всегрозное устрашение;
Pадуйся, Юже на воздусе сретают многоочитии Херувимы.
Радуйся, Ейже похвальная восписуют шестокрилатии Серафими;
Pадуйся, Еяже преблагому покрову и мы, земнороднии, благодарне покланяемся.
Радуйся, Радосте наша, покрый нас от всякаго зла честным Твоим омофором.

Видевше Тя святый Андрей со Епифанием в церкви на воздусе за христианы молящуюся, познаша, яко Матерь еси вознесшагося на Небо Христа Бога нашего, и, припадше на землю, радостно; покланяхуся всеблагому покрову Твоему, зовуще: Аллилуия.

Разум недоразуменен еси Богородице, Дево, в защищении людей православных, сего ради врази наши не познают, коль сильна есть молитва Божия Матере. Мы же, о Твоем всемощнем заступлении добре ведуще, сице к Тебе со умилением зовем:
Радуйся, премилосердая Утешительнице всех скорбящих и обремененных;
Pадуйся, неусыпающая Наставнице всех заблуждших и ослепленных.
Радуйся, праведно движимый гнев Божий на нас Твоим молением скоро уталяющая;
Pадуйся, злыя страсти наша всемощным мановением укрощающая.
Радуйся, крепкое возбуждение спящих совестей;
Pадуйся, нетрудное преодоление беззаконных навыков.
Радуйся, Еяже ради ад стенет и дуси злобы трепещут;
Pадуйся, Еяже ради врата рая всем нам отверзаются.
Радуйся, Радосте наша, покрый нас от всякаго зла честным Твоим омофором.

Сила Вышняго осеняет с верою и благоговением прибегающих к Твоему всечестному покрову: единей бо точию Тебе, Пресвятей и Пречистей Матери Божией, дадеся, да всякое прошение Твое исполнится. Тем убо всяк возраст верных славословит Тя и Сына Твоего, зовущ: Аллилуия.

Имущи богатство милосердия неоскудное, всем концем земли простираеши руку помощи, Владычице: болящим исцеление, страждущим ослабу, слепым прозрение и всем вся по коегождо потребе подаеши, благодарне вопиющим:
Радуйся, Православия несокрушимая крепосте и оградо;
Pадуйся, святых храмов и олтарей первейшее украшение.
Радуйся, благочестия вернейшее ограждение;
Pадуйся, благосердых градоправителей неусыпающая Споспешнице.
Радуйся, непобедимая Воеводо вождей и воинств христианских;
Pадуйся, святое зерцало правды судиям немздоприимным.
Радуйся, совершенный разуме наставников и детоводителей;
Pадуйся, благословение домов и семейств благочестивых.
Радуйся, Радосте наша, покрый нас от всякаго зла честным Твоим омофором.

Бурею многих бед одержимым нам помогаеши, Владычице: стоиши бо пред лицем олтаря Господня воздвигши руце Твой, и молишися, яко да нашу недостойную молитву призрит Господъ, Царь Славы, и послушает прошения призывающих имя Твое святое, к Сыну же Твоему зовущих: Аллилуия.

Слыша Господь Бог Иисуса Навина, молящася и повелевающа солнцу стати, дондеже отмстит врагом. Слышит и Твоя ныне моления Господь Иисус, избранная палато Духа Святаго. Темже и мы, грешнии, на Твой надеющеся покров, Тебе, яко Божией Матери, глаголати дерзаем:
Радуйся, от солнца мысленнаго озаренная и нас светом незаходимым просвещающая;
Pадуйся, сиянием пречистыя души Твоея всю землю просветившая.
Радуйся, чистотою телесе Твоего вся Небеса возвеселившая;
Pадуйся, святых обителей Христовых покров и снабдение;
Радуйся, верных пастырей Церкве бодрость и вразумление;
Pадуйся, богобоязненных иноков и инокинь Наставнице.
Радуйся, невозмущаемое успокоение благоговейных старцев;
Pадуйся, тайное веселие чистых дев и вдовиц.
Радуйся, Радосте наша, покрый нас от всякаго зла честным Твоим омофором.

Боговидец Моисей во ополчении иногда на Амалика, егда руце воздвизаше, Израиль одолеваше, егда же руце низпущаше, тогда Амалик побеждаше, поддержащими же его укреплен, по6еди врага. Ты же, о Богомати, воздевши руце Твои на умоление, аще и никимже поддержима, всегда побеждаеши враги христианския и нам щит еси непобедим, вопиющим: Аллилуия.

Видевше Тя святых собори на воздусе в церкви Влахернстей, молебнии руце к Сыну и Богу простирающую, радостно со Архангелы и Ангелы благодарную Ти песнь воспеша. Мы же крепчайшими, паче Моисеовых рук, дланьма Твоима укрепляеми, умильно вопием:
Радуйся, Еяже руце поддержит за всех нас единая Ея к нам любы и милосердие;
Pадуйся, пред Неюже врази наши, видимии и невидимии, стояти не могут.
Радуйся, темное полчище страстей и похотей наших прогоняющая;
Pадуйся, огнь Божественный, Христа неопально на руку Своею держащая и нас, хладных, тем воспламеняющая.
Радуйся, воинствующих на плоть целомудрием изрядное венчание;
Pадуйся, подвизающихся в посте и безмолвии присное собеседование.
Радуйся, изнемогающих от уныния и печали скорая Утешиеяьнице;
Pадуйся, благодатию смирения и терпения снабдевающая.
Радуйся, Радосте наша, покрый нас от всякаго зла честным Твоим омофором.

Проповедник неоскудеваемыя благодати и милостей Твоих явися святый Роман Сладкопевец, егда от Тебе во сне прият свиток книжный на снедение: тем убо умудрен, нача разумно пети во славу Твою, святым же писати похвальная, взывая с верою: Аллилуия.

Возсияла еси от истиннаго Солнца правды заря, Дево Богоотроковице, просвещающая всех премудростию Бога, Сына Твоего, и в познание истины приводящая зовущих Ти таковая:
Радуйся, Божию Силу и Божию Премудрость, Христа плотию породившая;
Pадуйся, юродивую мудрость века сего посрамившая и ослепленных ею на путь правый наставляющая.
Радуйся, святыя веры охранение и православных догматов Наставнице;
Pадуйся, нечестивых ересей и тлетворных расколов Искоренительнице.
Радуйся, тайная и неудобь предвиденная вся добре ведущая и имже подобает сказующая;
Pадуйся, лживых провидцев и суетная гадания посрамляющая.
Радуйся, в час недоумений мысль благу на сердце полагающая;
Pадуйся, от пагубных начинаний и несмысленных пожеланий воспящающая.
Радуйся, Радосте наша, покрый нас от всякаго зла честным Твоим омофором.

Хотяй долготерпеливый Всевидец Господь явити Своего человеколюбия неизследимую щедрот бездну, избра Тебе едину в Матерь Себе и сотвори Тя людем непреодоленное защищение: да аще кто от них и праведным судом Божиим осуждения достоин явится, Твоим обаче державным покровом сохраняется на покаяние, зовый: Аллилуия.

Дивная показал еси дела Твоя в Пречистей Матери Твоей, Господи, егда пречудный омофор в руце Ея светящийся паче луч солнечных явися, имже покрываше люди, сущия в церкви Влахернстей. О таковем убо знамении милосердаго Ея заступления услышавше, ужасом и радостию одержим и, вси глаголаху:
Радуйся, нерукотворенный омофор, аки облак, над всем миром распростершая;
Pадуйся, Превечнаго Архиерея, Сына Своего, знамение на руце Своей держащая.
Радуйся, новую милость и новую благодать сим в Церкви Православней являющая;
Pадуйся, столпе облачный, от искушений и соблазнов мира всех нас покрывающий.
Радуйся, столпе огненный, среди мглы греха всем нам путь спасения показующий;
Pадуйся, явных благочестия подвижников явное укрепление.
Радуйся, тайных среди мира рабов Божиих тайное вразумление;
Pадуйся, и мене, обнаженнаго добрых дел, не оставляющая Своим покровом и благодатию.
Радуйся, Радосте наша, покрый нас от всякаго зла честным Твоим омофором.

Дивно Тя от Небес во Влахернстей церкви явльшуюся Ангели воспеша, апостоли прославиша, лик святителей и преподобных и жен святых сословие восхвалиша, Предтеча с Богословом поклонишася, людие же, сущии в церкви, с веселием вопияху: Аллилуия.

Всеми вышними и нижними владычествуя Господь, узрев Тя в церкви Матерь Свою стоящу и со умилением к Нему молящуся, рече: «Проси, Мати Моя, зане не отвращуся Тебе, но исполню вся прошения Твоя и благодарственная сице Тебе всех Пети научу:
Радуйся, ковчеже Завета, в немже хранится освящение всего рода человеческаго;
Pадуйся, стамно пресвятая, в нейже алчущим правды блюдется Хлеб жизни вечныя.
Радуйся, сосуде всезлатый, в немже уготовася нас ради плоть и кровь Божественнаго Агнца;
Pадуйся, оставленных врачами на Свой всемощныя руце приемлющая.
Радуйся, разслабленных телом, но не духом и Верою со одра болезни воздвизающая;
Pадуйся, погубляющим от недуга ум новый и лучший смысл подающая.
Радуйся, на стропотном пути греха и страстей нас премудре запинающая;
Pадуйся, жестокость нераскаяннаго сердца нашего умиляющая:
Радуйся, Радосте наша, покрый нас от всякаго зла честным Твоим омофором.

Все естество ангельское похвальная приносит Тебе, истинней Божией Матери и Заступнице всех притекающих к Тебе, ведуще, яко несокрушимым покровом Твоим праведных возвеселяющи, грешных заступаеши, бедствующих избавляеши и молишися о всех верных, зовущих: Аллилуия.

Ветии многовещаннии, яко рыбы безгласныя, недоумеют, како восхвалити по достоянию великий всечестнаго Покрова Твоего праздник: вся бо о Тебе от них глаголемая не суть довольна к единому исчислению щедрот Твоих. Мы же, Твоя неисчетная благодеяния Видяще, с веселием взываем:
Радуйся, от язвы и всегубительства смертнаго нас соблюдающая;
Pадуйся, от внезапнаго колебания земли грады и веси сохраняющая.
Радуйся, от разлияния вод и потопления рукою крепкою возводящая;
Pадуйся, от запаления огненнаго росою молитв Твоих избавляющая.
Радуйся, от глада душевнаго и телеснаго Хлебом Жизни снабдевающая;
Pадуйся, удары молнии и грома от главы нашея отводящая.
Радуйся, от нашествия иноплеменник и тайных убийц спасающая;
Pадуйся, от домашния брани и вражды единокровных миром и любовию ограждающая.
Радуйся, Радосте наша, покрый нас от всякаго зла честным Твоим, омофором.

Спасти хотя род человеческий от прелести вражия Человеколюбец Господь Тебе, Матерь Свою, дарова земным нам в помощь, покров и защиту, да будеши печальным утешение, скорбящим радование, обидимым Заступница, и да всех из глубины греховный воздвигнеши, поющих: Аллилуия.

«Царю Небесный – глаголаше в молитве на воздусе со Ангелы стоящая Всенепорочная Царица, — приими всякаго человека, молящаяся к Тебе и призывающа имя Мое на помощь, да не отыдет от лика Моего тощ и неуслышан». Сию всеблагую молитву слышавше, собори святых благодарне возопиша:
Радуйся, чистых руками и сердцем земледельцев благословенными плодами венчающая;
Pадуйся, помоще и праведное мздовоздаяние всем право куплю деющим.
Радуйся, клятвопреступлений и неправедных стяжаний всенародное обличение;
Pадуйся, бедствующим в пути, на суше и водах внезапное вспоможение.
Радуйся, безчадных родителей плодами веры и духа веселящая;
Pадуйся, безматерних сирот незримая, Воспитательнице.
Радуйся, крепкая Заступнице сущих в плену и изгнании;
Pадуйся, неусыпающая Попечительнице во узах и темнице седящих.
Радуйся, Радосте наша, покрый нас от всякаго зла честным Твоим омофором.

Пение всеумиленное слышаше и теплей Твоей молитве о нас внемлющее, просим Тебе, Дево Богородице, не презри гласа рабов Твоих: к Тебе бо в напастех и скорбех прибегаем и пред Тобою в бедах наших слезы проливаем, зовуще: Аллилуия.

Яко светоприемную свещу, в молитве горящую, видящи Тя на воздусе Влахернская церковь, согласно со множеством людей, в ней бывших, возглашаше: «Откуду мне сие, да прииде Мати Господа Моего ко мне?» Святый же Андреи со Епифанием тепле моляхуся к Тебе, зовуще:
Радуйся, всех даров духовных и телесных независтная Подательнице;
Pадуйся, полагающих начало покаяния грешников верная Предстательнице.
Радуйся, борющихся со страстьми и прилогами вражиими всегдашняя Споборнице;
Pадуйся, незримое укрощение владык жестоких и зверонравных.
Радуйся, тайный покое и отрадо рабов кротких и страждущих;
Pадуйся, всежеланное совершение благих супружеств.
Радуйся, матерей детородящих скорое и безболезненное разрешение;
Pадуйся, в час кончины единая всем нам Помощнице.
Радуйся, Радосте наша, покрый нас от всякаго зла честным Твоим омофором.

Благодать Божественную испроси нам у Сына Твоего и Бога, простри нам руку помощи, отжени от нас всякаго врага и супостата и умири нашу Жизнь, да не погибнем люте без покаяния, но приими нас в вечныя кровы, Покровительнице наша, да радующеся Тебе зовем: Аллилуия.

Поюще Твой державный покров, хвалим Тя вси яко твердую предстательницу нашу и покланяемся Тебе, о нас молящейся: веруем бо и надеемся, яко испросиши у Сына Твоего и Бога благая вечная и временная всем с любовию вопиющим Тебе сице:
Радуйся, всей вселенней крепкое заступление;
Pадуйся, всех стихий земных и небесных освящение.
Радуйся, всех времен года благословение;
Pадуйся, всех наветов и искушений, от мира, плоти и диавола находящих, попрание.
Радуйся, нечаемое примирение ожесточенно враждующих;
Pадуйся, недоведомое исправление нераскаянных грешников.
Радуйся, не отвергающая всеми презренных и отверженных;
Pадуйся, самих отчаянных от рова погибели исхищающая.
Радуйся, Радосте наша, покрый нас от всякаго зла честным Твоим омофором.

О Всепетая Мати, Пречистая Госпоже, Дево Богородице! К Тебе возвожду душевныя и телесныя очи, к Тебе простираю разслабленнеи руце и из глубины сердца вопию: призри на веру и смирение души моея, покрый мя всемощным омофором Твоим, да избавлюся от всех бед и напастей, и в час кончины моея, о Всеблагая, предстани мне и уготованнаго ради грехов моих избави мучение, да выну покланяяся Тебе зову: Аллилуия.
Этот кондак читается трижды, затем икос 1-й и кондак 1-й

О Пресвятая Дево, Мати Господа вышних сил, Небесе и земли Царице, града и страны нашея всемощная Заступнице! Приими хвалебно-благодарственное пение сие от нас, недостойных раб Твоих, и вознеси молитвы наша ко Престолу Бога, Сына Твоего, да милостив будет неправдам нашим и пробавит благодать Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем яко к несомненней и скорой заступнице нашей: услыши нас, молящихся Тебе, осени нас вседержавным покровом Твоим и испроси у Бога, Сына Твоего, пастырем нашим ревность и бдение о душах, градоправителям мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание, всем же нам дух разума и благочестия, дух чистоты и правды. Ей, Госпоже Пресвятая, умилосердися на немощныя люди Твоя; разсеянныя собери, заблуждшия на путь правый настави, старость поддержи, юныя уцеломудри, младенцы воспитай и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наши ко зрению спасения; милостива нам буди зде и тамо, в стране земнаго пришельствия и на Страшнем суде Сына Твоего; преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных. Ты по Бозе наша Надежда и Заступница всех притекающих к Тебе с верою. К Тебе убо молимся и Тебе, яко всемогущей Помощнице, сами себе и друг друга и весь живот наш предаем, ныне и присно и во веки веков. Аминь.

Тропарь, глас 4:
Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим Покровом и избави нас от всякаго зла, молящи Сына Твоего, Христа Бога нашего, спасти души наша.

Кондак, глас 3:
Дева днесь предстоит в Церкви, и с лики святых невидимо за ны молится Богу, ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.

Величание
Величаем Тя, Пресвятая Дево, и чтим Покров Твой честный, Тя бо виде святый Андрей на воздусе, за ны Христу молящуюся.

Ино величание
Величаем Тя, Пресвятая Дево, Мати Христа, Бога нашего, и всеславный славим покров Твой. (Сие Величание поется на Святой Афонской горе в праздник Покрова Пресвятой Богородицы).

Ино величание
Величаем Тя, Пресвятая Дево, Мати Христа, Бога нашего, Иже к Сыну Свои руце простирающи, и о мире молящися, и честным Своим омофором защищающи град и люди от врагов наших. (Сие Величание поется на Святой Афонской горе в праздник Покрова Пресвятой Богородицы).

Память 1/14 октября