Избравый от всех родов Пречистейшую Ангел Деву и от Нея родивыйся плотию, Христе Боже наш, благодарственная приносим Ти раби Твои, Владыко. Ты же, яко имеяй милосердие неизреченное, от всяких нас бед свободи, зовущих:
Иисусе, Сыне Божий, воплотивыйся нас ради, слава Тебе.

Ангел множество собрася в Вифлееме видети непостижное Рождество; и, Видевше Творца своего, во яслех яко Младенца лежаща, удивишася! И страхом благоговеюще, Рождшагося и Рождшую боголепне почитаху, поюще таковая:
Слава Тебе, Сыне Божий, прежде век от Отца рожденный.
Слава Тебе, со Отцем и Духом вся сотворивый.
Слава Тебе, спасти погибшия пришедый.
Слава Тебе, даже до рабия зрака снизшедый.
Слава Тебе, Взыскателю заблуждших.
Слава Тебе, Спасителю погибших.
Слава Тебе, средостение вражды разрушившу.
Слава Тебе, рай, преслушанием затворенный, паки отверзшу.
Слава Тебе, род человеческий неизреченно возлюбившу.
Слава Тебе, на земли вертеп небо явившу.
Слава Тебе, рождшую Тя Деву Престол Херувимский показавшу.
Иисусе, Сыне Божий, воплотивыйся нас ради, слава Тебе.

Видяще безплотнии Ангели своего Владыку, от Чистыя Девы плоть приемша, ужасошася и друг ко другу реша: «Преславое сие таинство непостижимо нам является быти». Обаче дивящеся неизреченному Того снисхождению, со страхом пояху: Аллилуия.

Разумная вся тварь, ужасающися и благодарящи, поет Твоего Рождества, Владыко, таинство! Силы Небесныя радуются, поюще: «Слава в вышних Богу», и земля с человеки веселится, мы же непрестанно вопием:
Слава Тебе, в вышних славимому Богу.
Слава Тебе, мир на земли сотворившему.
Слава Тебе, нас Собою примирившему.
Слава Тебе, на земли нам явившемуся.
Слава Тебе, от Девы неизреченно воплотившемуся.
Слава Тебе, звезду возсиявшему.
Слава Тебе, тою волхвы на поклонение Тебе призвавшему.
Слава Тебе, дары от них милостивно приявшему.
Слава Тебе, всю тварь Тебе служити научившему.
Слава Тебе, и нас Тебе пети наставившему.
Слава Тебе, Себе нас соединившему.
Слава Тебе, нас Собою спасшему.
Иисусе, Сыне Божий, воплотивыйся нас ради, слава Тебе.

Сильный в крепости, Бог мира и Отец щедрот, прииде на землю спасти мир погибающий, ныне в Вифлееме яко Младенец раждается от Девы, Юже Матерь и Ходатаицу спасения показа всем Того воплощение славящим и поющим: Аллилуия.

Имуще Тебе пречисто Рождшую, о нас непрестанно молящуюся, радующеся, поем Твоего вочеловечения, Владыко, таинство! И Рождество от Девы Богоприятныя славословяще, вопием:
Слава Тебе, Сыне Божий.
Слава Тебе, Сыне Девы, от Девы несказанно родивыйся.
Слава Тебе, человеколюбия бездну на нас показавшему.
Слава Тебе, нас неизреченно возлюбльшему.
Слава Тебе, заблуждшее овча взыскавшему.
Слава Тебе, об обретении того срадоватися Ангелом рекшему.
Слава Тебе, на рамо сие восприемшему.
Слава Тебе, ко Отцу тое приведшему.
Слава Тебе, человеки со Ангелы во едино стадо совокупльшему.
Слава Тебе, мир от прелести избавльшему.
Слава Тебе, велию и неизреченную милость нам явившему.
Слава Тебе, нас паче инех тварей прославльшему.
Иисусе, Сыне Божий, воплотивыйся нас ради, слава Тебе.

Бурю внутрь имевый прежде помышлений сумнительных целомудренный Иосиф ныне внутрь божественнаго вертепа видит преславная. Аще бо и яко Человека видяше от Девы Раждаемаго, но разумеваше от вещей Бога быти Истиннаго; и Тем боголепне поклонився, радостно пояше: Аллилуия.

Слышаша пастырие Ангела, возвещающа им рождшагося Спаса миру во граде Давидове, и, скоро текше, видеша Сего яко агнца непорочна, во чреве Девыя упасшася, во яслех лежаща, и Рождшую, благоговейно служащу, и Иосифа, со страхом предстояща; сказаша о глаголанных к ним и, поклонившеся Рождшемуся, реша:
Слава Тебе, Агнче Божий, Спасе мира.
Слава Тебе, Сыне Божий, неизреченное чудо нам показавый.
Слава Тебе, Ангельских пений слышатели нас быти явивый.
Слава Тебе, с ними и нас славословити Тя научивый.
Слава Тебе, Ангелы и человеки пети Тя вразумивый.
Слава Тебе, на земли и на небеси радость сотворивый.
Слава Тебе, яко о Тебе небесная срадуются земным.
Слава Тебе, яко Тобою земная совокупляются небесным.
Слава Тебе, крепость диаволю немощну показавшему.
Слава Тебе, от того мучительства нас избавльшему.
Слава Тебе, в Тя верующим неизреченная радосте.
Слава Тебе, любящим Тя неизглаголанная сладосте.
Иисусе, Сыне Божий, воплотивыйся нас ради, слава Тебе.

Боготечную звезду, Христово Рождество предъявляющую, узревше звездоблюстителие волсви, тоя вождением Непостижимаго достигоша и Невидимаго видеша, возрадовашася же, Тому вопиюще: Аллилуия.

Видяще царие персидстии на руку Девичу Царя царствующих, яко на престоле Херувимстем седяща, и Владыку Того разумевающе, аще и рабий прият зрак, потщашася дары Ему принести: злато, яко Царю всех; ливан же яко Богу; смирну яко Безсмертному, и, поклонившеся, пояху:
Слава Тебе, Свет всем возсиявый.
Слава Тебе, нас звездою на поклонение Тебе призвавый.
Слава Тебе, злобу лютаго Ирода обличившему.
Слава Тебе, суетно того умышление показавшему.
Слава Тебе, нас от того прелести избавльшему.
Слава Тебе, покланятися Тебе — Солнцу Правды — научившему.
Слава Тебе, вся светом разума просветившему.
Слава Тебе, Твоим Рождеством многобожия прелесть упразднившему.
Слава Тебе, вражие владычество до конца низложившему.
Слава Тебе, со Отцем и Духом Тебе поклонятися нас научившему.
Слава Тебе, прельстившаго нас змия главу сокрушившему.
Слава Тебе, от вечныя смерти нас избавльшему.
Иисусе, Сыне Божий, воплотивыйся нас ради, слава Тебе.

Проповедник богоносных вещания яже о Тебе исполняя, на земли явил еси Себе, Спасе, во убозем ныне вертепе рождься от Чистыя Девы, и, богат сый, нас ради обнищал еси волею, да человеки обогатиши, верою Тебе поющия: Аллилуия.

Возсиял еси от Девы и Неискусомужныя Твоея Матере, Иисусе, яко солнце просвещая и прогоняя лжи тьму: демони бо, Спасе, не терпяще Твоея крепости, вси вострепеташа, и ад, видев чудо, убойся: мы же, благодарственно вопием Ти:
Слава Тебе, человеков Спасителю.
Слава Тебе, бесов Потребителю.
Слава Тебе, прелести начальника Твоим Рождеством устрашившему.
Слава Тебе, идольскую прелесть упразднившему.
Слава Тебе, светом богопознания вся осиявшему.
Слава Тебе, тьму неведения отгнавшему.
Слава Тебе, каменю, воду спасения всем источивый.
Слава Тебе, жажду Адамову и Давидову утоливый.
Слава Тебе, яко солнцем, Твоим Рождеством вся просветивый.
Слава Тебе, лучи благодати вселенней облиставый.
Слава Тебе, землю обетования нам показавый.
Слава Тебе, от всеродныя клятвы нас избавивый.
Иисусе, Сыне Божий, воплотивыйся нас ради, слава Тебе.

Хотя от века сокровенную тайну нам явити, от всея твари служители таинству показал еси, Спасе: от Ангел — Гавриила, от человек — Деву, от небес — звезду, от земли — вертеп, в немже родитися благоволил еси; темже дивящеся Твоей неизреченней премудрости, зовем: Аллилуия.

Новую показал еси тварь, явлься плотию всех Зиждитель, из безсеменныя прозяб утробы, и сохранив ю, яко же бе нетленну, и Ходатаицу спасения показал еси поющим:
Слава Тебе, Сыне Божий, Тя Рождшую Матерь милосердия показавый.
Слава Тебе, Тую и по Рождестве Деву сохранивый.
Слава Тебе, спасти Адама пришедый.
Слава Тебе, слезы Евины утоливый.
Слава Тебе, вся спасти возжелавый.
Слава Тебе, Воскресения образ облиставый.
Слава Тебе, грехов наших рукописание раздравый.
Слава Тебе, Собою смирения образ нам показавый.
Слава Тебе, нас ради обнищавый.
Слава Тебе, Твоею нищетою нас обогативый.
Слава Тебе, одеждою спасения нас одеявый.
Слава Тебе, Твоею любовию нас усладивый.
Иисусе, Сыне Божий, воплотивыйся нас ради, слава Тебе.

Странное и преславное Рождество Твое видевше, в вертепе совершающееся, устранимся суетнаго мира, ум на Божественная преложше. Сего бо ради Бог на земли явися смиренный Человек, да на небеса возведет Тому вопиющия: Аллилуия.

Весь еси желание, весь сладость любящим Тя, Христе Боже, и Твое Божественное снисхождение славящим, от Девы бо Чистыя рождьшся на земли, нас на небеса возводиши, поющих:
Слава Тебе, Сыне Божий, на земли родивыйся.
Слава Тебе, от Девы неизреченно воплотивыйся.
Слава Тебе, Себе нам показавшу.
Слава Тебе, нас, от Тебе далече сущих, призвавшу.
Слава Тебе, неизреченная наша радосте.
Слава Тебе, сердец наших сладосте.
Слава Тебе, в Рождестве Твоем свет спасения возсиявый.
Слава Тебе, слезы ради нашего спасения пролиявый.
Слава Тебе, теми пламень страстей наших угасивый.
Слава Тебе, нас от скверны греховныя омывый.
Слава Тебе, преступление разрушившему.
Слава Тебе, от тления нас избавльшему.
Иисусе, Сыне Божий, воплотивыйся нас ради, слава Тебе.

Всякое разумение и всяк ум Ангельский и человеческий не постигает Твоего непостижнаго Рождества таинства разумети; обаче, Владыко Благий, нашу любовь и веру приими и спаси нас, Тебе поющих: Аллилуия.

Вития многовещанныя яко рыбы безгласныя видим о Твоем воплощении, Владыко, недоумеют бо глаголати, како, Бог сый Совершен, Человек Совершенный явися, и от Девы Неискусобрачныя како родися; мы же, тайны не испытующе, верою единою славим Тя, вопиюще:
Слава Тебе, Ипостасная Божия Премудросте.
Слава Тебе, неизглаголанное всех веселие.
Слава Тебе, любомудры немудрыя явивый.
Слава Тебе, о Тебе испытующих посрамивый.
Слава Тебе, вся баснотворная плетения растерзавый.
Слава Тебе, свет боговедения всем возсиявый.
Слава Тебе, мудрость во Твоих делех пролиявый.
Слава Тебе, многим разум просветивый.
Слава Тебе, путь спасения нам показавый.
Слава Тебе, неизчетная бездно милосердия.
Слава Тебе, пучино щедрот и человеколюбия.
Иисусе, Сыне Божий, воплотивыйся нас ради, слава Тебе.

Спасти восхотев мир погибающий, Иже всех Украситель, от Девы, яко Младенец раждается и во яслех пеленами повивается, разрешаяй многоплетенныя пленицы прегрешений, и Сын сый Божий, Девыя Сын бывает, и вся мудре устрояет, да спасет Тому поющия: Аллилуия.

Стена и столп злобы богопротивныя Ирод пребеззаконный показася, жизнь всем Подающаго убити богоборец тщашеся, и незлобивыя младенцы, яко класы незрелы, мечем пожинахуся; тем же и мы, злобу всякую от сердец наших отринувше, нас спасти Пришедшаго прославим, вопиюще:
Слава Тебе, Иродово умышление тщетно показавый.
Слава Тебе, от того избиенныя младенцы со Ангелы сопричтый.
Слава Тебе, злобы Потребителю.
Слава Тебе, смирения Наставниче и смертных Любителю.
Слава Тебе, рог гордости сломивый.
Слава Тебе, свет правды всем воссиявый.
Слава Тебе, кротости и смирению, образ дав Себе, всех научивый.
Слава Тебе, вся в Твое познание приведый.
Слава Тебе, Тя Рождшия утробу Твоим Рождеством освятивый.
Слава Тебе, от пастырей чудо и от волхвов дары приявый.
Слава Тебе, и безсловесныя Тебе служити научивый.
Слава Тебе, всю тварь освятивый.
Иисусе, Сыне Божий, воплотивыйся нас ради, слава Тебе.

Пение всякое Твоему еже нас ради воплощению достойно принести хотящих побеждается. Тем же и нам удобее есть любити молчание, ибо аще и равночисленныя песка морскаго песни приносим Ти, Царю Пресвятый, ничтоже совершаем достойно; тем же со страхом поем: Аллилуия.

Свет Тя незаходимый сущии во тьме и сени смертней седящии, Спасе наш, узревше, от Девы воссиявша, просветишася огнем Твоего Божества; и Тебе, премудрости и смысла Подателю, пояху сицевая:
Слава Тебе, Сыне Божий, Свете неизреченный.
Слава Тебе, Солнце Правды, Твоим Рождеством вся просветивый.
Слава Тебе, многосветлое просвещение возсиявшему.
Слава Тебе, многотекущую благодати реку нам источившему.
Слава Тебе, жаждущих водою спасения богатно напоившему.
Слава Тебе, любящим Тя иго благо и бремя Твое легко показавшему.
Слава Тебе, от бремене греховнаго нас облегчившему.
Слава Тебе, нас от работы вражия избавльшему.
Слава Тебе, Твоим на земли явлением вся возвеселивый.
Слава Тебе, утешатися нам надеждею пакибытия даровавый.
Слава Тебе, нам желаний наших край Себе явивый.
Слава Тебе, нас, врагов сущих, со Отцем примиривый.
Иисусе, Сыне Божий, воплотивыйся нас ради, слава Тебе.

Благодать всем подати и долги человеков разрешити пришедый, Спасе наш, Твоим воплощением, и наша долги разреши и грехов рукописание раздери, Твое несказанное Рождество славящих и непрестанно поющих: Аллилуия.

Поюще Твое вочеловечение, хвалим, благословим и покланяемся Тебе, Спасе наш, и веруем, яко Господь и Бог еси, спасаяй всех на Тя уповающих и Твое еже от Девы неизреченное Рождество славословящих и поющих таковая:
Слава Тебе, Сыне Божий, в Вышних со Отцем и Духом покланяемый.
Слава Тебе, от всех колен небесных и земных славимый.
Слава Тебе, сокровенное от века таинство открывый.
Слава Тебе, Твою к нам неизреченную любовь явивый.
Слава Тебе, всея твари Украсителю.
Слава Тебе, наш Всемилостивый Спасителю.
Слава Тебе, благочестно царствующих на земли скипетры утверждаяй.
Слава Тебе, святители благоговейныя и иереи премудростию и благолепием украшаяй.
Слава Тебе, Церкве основание и утверждение.
Слава Тебе, всем верным спасение и украшение.
Слава Тебе, телес наших Врачу и исцеление.
Слава Тебе, душ наших Украсителю и Спасителю.
Иисусе, Сыне Божий, воплотивыйся нас ради, слава Тебе.

О Пресладкий и Всещедрый Иисусе, Спасителю наш, Творче и Владыко! Приими ныне малое сие молебное благодарение и славословие наше, якоже приял еси от волхвов поклонение и дары; и сохрани нас, раб Твоих, от всякия напасти, и грехов прощение даруй, и вечныя избави муки верно славящих Твое от Чистыя Девы Рождество и вопиющих Ти: Аллилуия.
Этот кондак читается трижды, затем икос 1-й: «Ангел множество собрася...» и кондак 1-й: «Избравый от всех родов...»

Тропарь, глас 4:
Рождество Твое Христе Боже наш, возсия мирови свет разума: в нем бо звездам служащии, звездою учахуся Тебе кланятися Солнцу Правды, и Тебе ведети с высоты Востока: Господи, слава Тебе!

Кондак, глас 3:
Дева днесь Пресущественнаго раждает, и земля вертеп Неприступному приносит, Ангелы с пастырьми славословят, волсви же со звездою путешествуют: нас бо ради родися Отроча младо Превечный Бог.

Кондак, глас 6:
Иже прежде денницы от Отца без матере родивыйся, на земли без Отца воплотивыйся днесь из Тебе: темже звезда благовествует волхвам, Ангелы же с пастырьми поют несказанное Рождество твое, Благодатная.

Величаем Тя, Живодавче Христе, нас ради ныне плотию рождшагося от Безневестныя и Пречистыя Девы Марии.